बेळगाव : राष्ट्रीय महामार्ग क्रमांक ४ वर हत्तरगी टोल नाक्याजवळ झालेल्या भीषण अपघातात एका कंटेनर चालकाचा जागीच मृत्यू झाला. मध्यरात्रीच्या सुमारास घडलेल्या या घटनेनंतर यमकनमर्डी पोलीस ठाण्यात गुन्हा नोंद करण्यात आला आहे.

यमकनमर्डी पोलीस ठाण्याच्या हद्दीतील हंचनाळ गावाजवळ, शिवप्रसाद हॉटेलसमोर हा अपघात घडला. तामिळनाडू राज्यातील दिंडीगुल जिल्ह्यातील कुपैपट्टी येथील रहिवासी जयकुमार एस. सेल्लादुराई (वय ३४) असे मृत चालकाचे नाव आहे.

मिळालेल्या माहितीनुसार, जयकुमार हे आपल्या ताब्यातील कंटेनर घेऊन संकेश्वरकडून बेळगावच्या दिशेने जात होते. यावेळी त्यांच्या कंटेनरची पुढे चाललेल्या ट्रकला मागून जोरदार धडक बसली. धडकेची तीव्रता इतकी होती की, कंटेनरचे मोठे नुकसान झाले आणि चालक जयकुमार यांचा घटनास्थळीच मृत्यू झाला.

या प्रकरणी ट्रकमधील क्लिनर प्रताप बाबूराव तिडके यांनी दिलेल्या फिर्यादीवरून यमकनमर्डी पोलिसांनी गुन्हा दाखल केला आहे. पोलीस निरीक्षक जावेद मुशापुरे यांच्या मार्गदर्शनाखाली या अपघाताचा पुढील तपास सुरू आहे.

The post हत्तरगी टोल नाक्याजवळ भीषण अपघात appeared first on News 24 Tass Marathi.

कागवाड : कागवाड पोलीस ठाण्याच्या हद्दीत झालेल्या दोन वेगवेगळ्या रस्ता अपघातांमध्ये दोन जणांचा मृत्यू झाला असून एका व्यक्तीवर गंभीर अवस्थेत उपचार सुरू आहेत.

पहिला अपघात कागवाड – शेडबाळ मार्गावरील उप्पारवाडी परिसरात घडला. शेडबाळकडून कागवाडच्या दिशेने जाणाऱ्या दुचाकीची समोरून जाणाऱ्या मारुती स्विफ्ट कारला मागील बाजूस जोरदार धडक बसली. या अपघातात मिरज तालुक्यातील सावळी येथील रहिवासी महानंदा सचिन चौगुले (वय ३८) यांचा घटनास्थळीच मृत्यू झाला. तर दुचाकी चालवत असलेले त्यांचे पती सचिन चौगुले (वय ४४) गंभीर जखमी झाले असून त्यांच्यावर मिरज येथील खासगी रुग्णालयात उपचार सुरू आहेत.

दुसरी घटना मिरज-चिकोडी मार्गावरील शिरगुप्पी गावाजवळ घडली. विठ्ठल बसप्पा अक्कीमरडी (वय ५०, रा. निडगुंदी, ता. रायबाग) हे दुचाकीवरून प्रवास करत असताना त्यांच्या वाहनाची राज्य परिवहन महामंडळाच्या बसला समोरून धडक बसली. या अपघातात त्यांचा जागीच मृत्यू झाला.

दोन्ही घटनांची माहिती मिळताच सहाय्यक पोलीस उपनिरीक्षक जे. ए. सोनावणे यांनी घटनास्थळी भेट देऊन पंचनामा केला. याप्रकरणी कागवाड पोलीस ठाण्यात स्वतंत्र गुन्ह्यांची नोंद करण्यात आली असून पुढील तपास सुरू आहे.

The post कागवाड तालुक्यातील दोन वेगवेगळ्या अपघातांत दोघांचा मृत्यू appeared first on News 24 Tass Marathi.

बेळगाव : बेळगाव-गोवा राष्ट्रीय महामार्गावरील अनमोड घाट परिसरात बुधवारी मध्यरात्री कार आणि टेम्पो यांच्यात समोरासमोर झालेल्या भीषण अपघातात दोघांचा जागीच मृत्यू झाला, तर तिघेजण गंभीर जखमी झाले. रामनगर-अनमोड मार्गावरील गवेगाळी क्रॉस येथे घडलेल्या या दुर्घटनेमुळे काही काळ महामार्गावरील वाहतूक विस्कळीत झाली होती.

मिळालेल्या माहितीनुसार, आंध्र प्रदेश पासिंगची कार (एपी 02 बीएएन 0292) गोव्याहून कर्नाटकच्या दिशेने येत होती. त्याचवेळी कोंबड्यांनी भरलेला टेम्पो (जीए 09 यू 6990) गोव्याच्या दिशेने जात होता. गवेगाळी क्रॉस येथे कार चालकाने समोरील वाहनाला ओव्हरटेक करण्याचा प्रयत्न केला असता समोरून भरधाव येणाऱ्या टेम्पोची जोरदार धडक बसली.

धडक इतकी जबरदस्त होती की कार आणि टेम्पोच्या पुढील भागाचा अक्षरशः चुराडा झाला. टेम्पोतील कोंबड्याही रस्त्यावर विखुरल्या गेल्या. या अपघातात कारमधील दोघेजण जागीच ठार झाले असून ते आंध्र प्रदेशातील रहिवासी असल्याची प्राथमिक माहिती पोलिसांनी दिली आहे.

अपघातात कार चालकासह टेम्पोमधील नवरा-बायको गंभीर जखमी झाले असून त्यांना तातडीने उपचारासाठी जवळच्या रुग्णालयात दाखल करण्यात आले आहे. जखमींपैकी काहींची प्रकृती चिंताजनक असल्याचे समजते.

घटनेची माहिती मिळताच स्थानिक नागरिक आणि प्रवाशांनी घटनास्थळी धाव घेत मदतकार्य सुरू केले. पोलिसांनी तातडीने घटनास्थळी पोहोचून वाहतूक सुरळीत केली. बुधवारी रात्री दीडच्या सुमारास ही दुर्घटना घडल्याचे सांगितले जात आहे.

सततचा पाऊस, घाट परिसरातील धोकादायक वळणे आणि भरधाव वाहनचालन यामुळे या मार्गावर अपघातांचे प्रमाण वाढत असल्याची चर्चा स्थानिकांमध्ये सुरू आहे. याप्रकरणी रामनगर पोलीस ठाण्यात नोंद झाली असून पुढील तपास सुरू आहे.

The post अनमोड घाटात भीषण अपघात ; दोघांचा जागीच मृत्यू appeared first on News 24 Tass Marathi.

रायबाग रेल्वे स्थानकाजवळ हा अपघात झाला. या दुर्घटनेत दुचाकीस्वार महांतेश, त्यांची पत्नी साक्षी आणि त्यांच्या सहा महिन्यांच्या चिमुकल्याचा जागीच मृत्यू झाला.

या घटनेमुळे परिसरात हळहळ व्यक्त होत असून संबंधित कुटुंबावर दुःखाचा डोंगर कोसळला आहे. घटनेची माहिती मिळताच रायबाग पोलिसांनी घटनास्थळी भेट देऊन पाहणी केली. याप्रकरणी गुन्हा नोंदवून पुढील तपास सुरू करण्यात आला आहे.

The post रायबाग तालुक्यात भीषण अपघातात एकाच कुटुंबातील तिघांचा मृत्यू appeared first on News 24 Tass Marathi.

बेळगाव : पुणे – बेंगळूर गोटूर नजीक राष्ट्रीय महामार्गावर भरधाव कारने मालवाहू ट्रकला मागून जोरदार धडक दिल्याने झालेल्या भीषण अपघातात एकाचा जागीच मृत्यू झाला असून तिघेजण गंभीर जखमी झाले आहेत. हा अपघात पहाटे पाचच्या सुमारास घडला.

या अपघातात हनुमंत पायाळ यांचा जागीच मृत्यू झाला. ते मूळचे सापनाई (ता. कळंब) येथील असून सध्या कात्रज-सातारा रोड, पुणे येथे वास्तव्यास होते. जखमींमध्ये महानंदा हनुमंत पायाळ (वय ४५), अनिल दाजीराम अंगारके (वय ५०), अजय अनिल अंगारके (वय २८) आणि सुनीता अनिल अंगारके (वय ४५) यांचा समावेश असून सर्वजण पुणे येथील रहिवासी आहेत. त्यांच्यावर बेळगावातील रुग्णालयात उपचार सुरू आहेत.

मिळालेल्या माहितीनुसार, संबंधित कुटुंबीय हुबळी येथील नातेवाईकांना भेटण्यासाठी पुण्याहून कारने निघाले होते. संकेश्वरमार्गे हुबळीच्या दिशेने जात असताना गोटूर हद्दीत त्यांच्या कारने समोरील मालवाहू ट्रकला मागून जोरदार धडक दिली. ट्रक संकेश्वरहून धारवाडकडे जात होता.

अपघाताची माहिती मिळताच पोलिसांनी घटनास्थळी धाव घेऊन मदतकार्य केले. पुढील तपास सुरू आहे.

The post पुणे – बेंगळूर राष्ट्रीय महामार्गावर भीषण अपघातात एक ठार appeared first on News 24 Tass Marathi.

खानापूर : तालुक्यातील खानापूर–बिडी मुख्य मार्गावर कुनकीकोप्प गावाजवळ पर्यटक बसचा अपघात झाला. बसचे स्टेअरिंग अचानक लॉक झाल्याने चालकाचे वाहनावरील नियंत्रण सुटले आणि बस रस्त्याच्या कडेला असलेल्या झाडाला जाऊन धडकली.

या अपघातात बसमधील दोन प्रवासी किरकोळ जखमी झाले असून, सुदैवाने कोणतीही जीवितहानी झाली नाही. अपघातानंतर काही काळ परिसरात गोंधळाचे वातावरण निर्माण झाले होते.

घटनेची माहिती मिळताच नंदगड पोलीस ठाणे येथील हवालदार रामप्पा खेमाले यांनी तातडीने घटनास्थळी धाव घेत परिस्थिती नियंत्रणात आणली. पोलिसांनी वाहतूक सुरळीत ठेवण्याबरोबरच जखमी प्रवाशांना आवश्यक मदत व पुढील प्रवासासाठी सुविधा उपलब्ध करून दिल्या. अपघातानंतर तत्परतेने मदतकार्य केल्याबद्दल स्थानिक नागरिकांनी पोलिसांचे कौतुक केले आहे.

The post खानापूर – बिडी मार्गावर बसचा भीषण अपघात appeared first on News 24 Tass Marathi.

कित्तूर : तालुक्यातील चिकबागेवाडी आणि एम. के. हुबळी दरम्यान झालेल्या भीषण रस्ते अपघातात एका दुचाकीस्वाराचा जागीच मृत्यू झाला. भरधाव वेगाने आलेल्या अज्ञात वाहनाने दुचाकीला जोरदार धडक दिल्याने हा अपघात घडला असून, अपघातानंतर वाहनचालक घटनास्थळावरून फरार झाला आहे.

बैलहोंगल तालुक्यातील तिगडी गावचे रहिवासी यासीन (वय ४५) असे मृत व्यक्तीचे नाव आहे. यासीन हे एम. के. हुबळी येथून चिकबागेवाडी गावाच्या दिशेने दुचाकीवरून जात असताना भरधाव वाहनाने त्यांच्या दुचाकीला धडक दिली. धडक इतकी भीषण होती की संबंधित वाहन त्यांच्या डोक्यावरून गेल्याने त्यांचा जागीच मृत्यू झाला.

घटनेची माहिती मिळताच कित्तूर पोलिसांनी घटनास्थळी धाव घेऊन पंचनामा केला. मृतदेह उत्तरीय तपासणीसाठी पाठवण्यात आला असून, पोलिसांनी ‘हिट अँड रन’चा गुन्हा नोंदवला आहे. फरार वाहनचालकाचा शोध सुरू असून पुढील तपास कित्तूर पोलीस करत आहेत.

The post चिकबागेवाडी – एम. के. हुबळी मार्गावर भीषण अपघात appeared first on News 24 Tass Marathi.

रामदुर्ग : तालुक्यातील हलगट्टी गावाजवळ झालेल्या भीषण रस्ता अपघातात दुचाकीस्वाराचा जागीच मृत्यू झाल्याची दुर्दैवी घटना घडली. सौंदत्ती आगाराच्या केएसआरटीसी बसला भरधाव वेगातील दुचाकीची जोरदार धडक बसल्याने हा अपघात झाला. या दुर्घटनेत मल्लेश हणमंत लमाणी यांचा जागीच मृत्यू झाला आहे.

याबाबत घटनास्थळावरून प्राप्त माहितीनुसार, हलगट्टी गावाजवळून जात असताना भरधाव वेगातील दुचाकी थेट बसवर आदळली. या धडकेत दुचाकीस्वाराच्या डोक्याला गंभीर दुखापत झाली. मोठ्या प्रमाणात रक्तस्राव झाल्याने त्यांचा घटनास्थळीच मृत्यू झाला. अपघातानंतर परिसरात काही काळ तणावाचे वातावरण निर्माण झाले होते.

घटनेची माहिती मिळताच रामदुर्ग पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी रामदुर्ग सार्वजनिक रुग्णालयात पाठविण्यात आला आहे. याप्रकरणी रामदुर्ग पोलीस ठाण्यात गुन्हा नोंद झाला असून पुढील तपास सुरू आहे.

The post हलगट्टीनजीक भीषण अपघातात दुचाकीस्वाराचा जागीच मृत्यू appeared first on News 24 Tass Marathi.

चिक्कोडी : तालुक्यातील इंगळी गावात विजेचा धक्का लागून ९ वर्षांच्या मुलीचा मृत्यू झाल्याची हृदयद्रावक घटना घडली आहे. या घटनेमुळे गावात शोककळा पसरली आहे. मृत मुलीचे नाव सान्वी कांबळे (वय ९) असून ती येथील शासकीय प्राथमिक शाळेत इयत्ता तिसरीत शिक्षण घेत होती.

मिळालेल्या माहितीनुसार, सान्वी काल सायंकाळी घरी खेळत असताना दोरीउडीची दोरी घरावरील विजेच्या तारेवर अडकली. ती दोरी काढण्यासाठी वरच्या मजल्यावर गेली असता तिला विजेचा जोरदार धक्का बसला. त्यानंतर ती छतावरून खाली कोसळली.

घटनेनंतर तिला तातडीने जवळील खाजगी रुग्णालयात दाखल करण्यात आले. मात्र उपचारादरम्यान तिचा मृत्यू झाला. या प्रकरणी अंकली पोलीस ठाण्यात गुन्हा नोंद करण्यात आला असून पुढील तपास सुरू आहे.

The post विजेचा धक्का लागून अल्पवयीन मुलीचा मृत्यू appeared first on News 24 Tass Marathi.

मध्यप्रदेश : धार जिल्ह्यात बुधवारी रात्री झालेल्या भीषण अपघातात पिक-अप वाहन उलटल्याने १२ मजूरांचा मृत्यू झाला असून सुमारे २० जण जखमी झाले आहेत. चिकलिया येथील रिलायन्स पेट्रोल पंपाजवळ हा अपघात घडला.

मिळालेल्या माहितीनुसार, रात्री सुमारे साडेआठ वाजता मजुरांना घेऊन जाणारी पिक-अप गाडी अनियंत्रित होऊन उलटली. वाहनात क्षमतेपेक्षा अधिक, सुमारे ३० हून अधिक मजूर प्रवास करत होते. गाडी उलटल्यानंतर अनेक जण तिच्या खाली दबले गेले, तर काहींचा जागीच मृत्यू झाल्याची माहिती प्रत्यक्षदर्शींनी दिली. मृतांमध्ये दोन लहान मुलांचाही समावेश आहे.

अपघाताची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले. त्यानंतर पोलिसही घटनास्थळी दाखल झाले. जखमींना तातडीने जिल्हा रुग्णालयात दाखल करण्यात आले असून, गंभीर जखमींना पुढील उपचारासाठी इंदौर येथे हलवण्यात आले आहे.

धार जिल्ह्याचे प्रभारी जिल्हाधिकारी अभिषेक चौधरी यांनी १२ जणांचा मृत्यू झाल्याची पुष्टी केली असून, जखमींवर उपचार सुरू असल्याचे सांगितले. या प्रकरणी पोलिसांनी गुन्हा नोंदवून पुढील तपास सुरू केला आहे.

The post मध्य प्रदेशात पिक-अप व्हॅन उलटून १२ मजूरांचा मृत्यू appeared first on News 24 Tass Marathi.