बेळगाव / प्रतिनिधी
सार्वजनिक बांधकाम आणि जिल्हा पालकमंत्री सतीश जारकीहोळी यांनी अंदाजे ५० कोटी रु. खर्चून खानापूर – जांबोटी मार्गावर सुरु असलेल्या बेळगाव – गोवा रस्त्याच्या दुरुस्तीच्या कामाची पाहणी केली.
यावेळी पत्रकारांशी बोलताना मंत्री सतीश जारकीहोळी म्हणाले, जांबोटी मार्गावरील बेळगाव – गोवा रस्ता दुरुस्तीची मागणी होत आहे. त्यानुसार, त्यांनी केंद्र सरकारची मान्यता मिळवली आणि रस्ता निर्दिष्ट वेळेत बांधण्यात आला, असे त्यांनी सांगितले. गोवा राज्यात जाण्यासाठी प्रवाशांसाठी हा एक जवळचा रस्ता आहे. पूर्वी रस्त्याची खूपच दुरवस्था होती. पावसाळ्यात या मार्गावरून लोक भीतीने प्रवास करायचे. हा रस्ता धोकादायक असल्याने, अपघात झाला असता तर जखमींना रुग्णालयात पोहोचवणे अशक्य झाले होते.
यासर्व बाबी लक्षात घेऊन, जनतेला आणि प्रवाशांना फायदा व्हावा म्हणून रस्त्याची दुरुस्ती अतिशय कमी कालावधीत करण्यात आली. त्याचप्रमाणे प्रवाशांनीही वेगमर्यादेत प्रवास करावा. अपघात रोखण्यासाठी, पोलिस विभागाला अतिवेगाने प्रवास करणाऱ्या प्रवाशांवर दंड आकारण्याचे निर्देश दिले जातील. पावसाळा सुरू होण्यापूर्वी जिल्ह्यात अनेक रस्ते दुरुस्ती, खड्डे बुजवणे आणि नवीन रस्ते बांधण्यात आले आहेत. जिल्ह्यातील वाहतूक सुरळीत करण्यासाठी रस्ते दुरुस्तीसह विविध विकास कामे हाती घेतली जातील, अशी माहिती मंत्री सतीश जारकीहोळी यांनी पत्रकारांना दिली.
यावेळी बेळगावचे माजी महापौर तथा सामाजिक कार्यकर्ते विजय मोरे, ॲलन मोरे , सुजित मुळगुंद आदी उपस्थित होते.
