- पालकमंत्री सतीश जारकीहोळी यांचे निर्देश
- सुवर्ण विधानसौध येथे केडीपी प्रगती आढावा बैठक
बेळगाव / प्रतिनिधी
बेळगाव जिल्ह्यातील पिण्याच्या पाण्याबाबत समस्याग्रस्त गावे ओळखून खबरदारीच्या उपाययोजना कराव्यात. कडक उन्हाळ्यामुळे पिण्याच्या पाण्याच्या पुरवठ्यात कोणतीही अडचण येणार नाही याची काळजी घेण्याचे निर्देश सार्वजनिक बांधकाम विभाग आणि जिल्ह्याचे पालकमंत्री सतीश जारकीहोळी यांनी अधिकाऱ्यांना दिले.
मंगळवारी बेळगाव येथील सुवर्ण विधानसौध येथे आयोजित २०२४ – २५ या वर्षाच्या चौथ्या तिमाहीतील केडीपी प्रगती आढावा बैठकीच्या अध्यक्षस्थानावरून बोलताना ते म्हणाले की, जलजीवन मिशन अंतर्गत हाती घेतलेली सर्व कामे लवकरात लवकर पूर्ण करावीत. बहुतांशी गावातील पेयजल प्रकल्पाची कामे पूर्ण करून इतर कामांबाबतचे प्रस्ताव सरकारला तातडीने सादर करण्याची सूचना त्यांनी केली.
जलजीवन मिशन आणि प्रलंबित कामे पूर्ण करण्यासाठी वरच्या पातळीवरील जलसाठ्यांच्या बांधकामाबाबत संबंधित मतदारसंघातील आमदारांसोबत बैठक घ्यावी. जिल्ह्यासाठी मंजूर झालेले कर्करोग रुग्णालय बेळगाव शहरात, विशेषतः बीम्स रुग्णालयाच्या परिसरात बांधण्याचा निर्णय घेण्यात आला आहे. यासाठी योग्य जागा दिली जाईल, असे त्यांनी सांगितले.
जिल्ह्यातील सुपर स्पेशालिटी रुग्णालयात कुशल तज्ञ डॉक्टर आणि कर्मचाऱ्यांची भरती करण्यासाठी पावले उचलली जात आहेत. ही बाब मुख्यमंत्र्यांच्याही निदर्शनास आणून देण्यात आली आहे. सरकार शिक्षण आणि आरोग्य क्षेत्रांना खूप महत्त्व देत आहे. जिल्ह्यात बांधण्यात येणाऱ्या रुग्णालयांमधील डॉक्टरांची कमतरता दूर करण्यासाठी जिल्ह्यातील आमदारांशी चर्चा केली जाईल, असे ते म्हणाले.
अपंगांना वाटण्यात येणाऱ्या तीनचाकी वाहनांचे वाटप संबंधित आर्थिक वर्षातच करण्यासाठी पावले उचलली पाहिजेत. कोणत्याही कारणास्तव वाहनांच्या डिलिव्हरीमध्ये विलंब होऊ नये. बैठकीला गैरहजर राहून पुरेशी माहिती न दिल्याबद्दल झोपडपट्टी विकास महामंडळाच्या अधिकाऱ्यांवर कारवाई करण्याचे आणि झोपडपट्टी विकास महामंडळाकडून घरांच्या बांधकामाबाबत त्या स्तरावर बैठक घेऊन माहिती देण्याचा आदेश त्यांनी जिल्हाधिकाऱ्यांना दिला.
अंगणवाडी केंद्रांना पुरवल्या जाणाऱ्या अंड्यांसह विविध अन्नपदार्थांची गुणवत्ता तपासली पाहिजे. जिल्ह्यातील अंगणवाडी सेविका आणि मदतनीसांची रिक्त पदे लवकरात लवकर भरण्याचे निर्देश त्यांनी दिले. चालू वर्षाचे एसएसएलसी निकाल समाधानकारक नाहीत तेव्हा गटशिक्षणाधिकाऱ्यांनी याचा गांभीर्याने विचार करावा आणि तळागाळातून चांगले काम करण्यासह निकाल सुधारण्यावर लक्ष केंद्रित करावे असे त्यांनी सांगितले.
वनविभागाने मालकी हक्कपत्रे जारी करण्यात सहभागी असलेल्या विभागीय अधिकाऱ्यांना प्रशिक्षण द्यावे आणि नियमितपणे बैठकांना उपस्थित राहावे. पुढील बैठकीपूर्वी मंत्री आणि आमदारांच्या अध्यक्षतेखाली विभागीय प्रगती आढावा बैठका आयोजित करण्याच्या सूचना त्यांनी जिल्हाधिकाऱ्यांना दिल्या. या बैठकीला आमदार उपस्थित राहतील असे मंत्री सतीश जारकीहोळी म्हणाले.
बैठकीत विविध मुद्दे उपस्थित करणारे बैलहोंगलचे आमदार महांतेश कौजलागी म्हणाले की, आमदारांच्या मतदारसंघ विकास अनुदानांतर्गत कामे हाती घेण्याचा प्रस्ताव ठेवण्यात आला आहे. तथापि, अधिकृत पातळीवर अतिशय संथ गतीने काम सुरू असल्याने, निधीच्या वापरात तांत्रिक अडचणी येत आहेत. “म्हणून, आमदारांनी ज्या कामांसाठी अनुदान जारी केले आहे ते वेळेच्या आत पूर्ण करावेत,” अशी मागणी त्यांनी केली.
झोपडपट्टी विकास महामंडळाच्या कारभारावर तीव्र नाराजी व्यक्त करताना आमदार कौजलगी म्हणाले की, ज्या लाभार्थ्यांना घरांच्या बांधकामासाठी आधीच रक्कम दिली आहे त्यांच्यासाठी तातडीने घरे बांधण्यासाठी पावले उचलावीत.
काही कार्यालयांमध्ये आमदार अनुदानांतर्गत सुरू असलेल्या कामांच्या निविदा प्रक्रियेत होणारा विलंब ही अत्यंत गंभीर बाब आहे. यामुळे स्थानिक लोकप्रतिनिधींना पेचप्रसंगाचा सामना करावा लागत असून अधिकाऱ्यांनी याकडे लक्ष द्यावे, असे ते म्हणाले.
चालू वर्षात जिल्ह्याचा एसएसएलसी निकाल समाधानकारक नाही. बेळगाव हे एक प्रमुख शैक्षणिक केंद्र असले तरी, खराब निकाल हा चिंतेचा विषय आहे शिक्षण विभाग या मुद्द्यावर गांभीर्याने विचार करेल आणि जिल्ह्याचे निकाल सुधारण्यासाठी पावले उचलेल, असेही आमदार कौजलगी म्हणाले.
बेळगाव उत्तर विधानसभा मतदारसंघाचे आमदार आसिफ (राजू) सेठ म्हणाले की, अपंगांना वाटण्यात येणारी तीनचाकी वाहने संबंधित आर्थिक स्तरानुसार वितरित केली पाहिजेत. यामध्ये अपंग आणि ज्येष्ठ नागरिकांच्या प्रश्नांना प्राधान्य दिले पाहिजे असे ते म्हणाले.
बेळगाव शहरात उभारल्या जाणाऱ्या सुपर स्पेशालिटी हॉस्पिटलमध्ये कुशल डॉक्टर आणि कर्मचाऱ्यांच्या रिक्त जागा लवकरच भरण्यासाठी प्रयत्न सुरू आहेत.
झोपडपट्टी विकास महामंडळाच्या कारभारावर नाराजी व्यक्त करून, घर बांधण्यासाठी लाभार्थ्यांकडून पैसे घेतले आणि घरे बांधल्याशिवाय पैसे परत न करणाऱ्या काही कंत्राटदारांवर योग्य कारवाई करण्याची मागणी त्यांनी केली.
रायबागचे आमदार दुर्योधन ऐहोळे म्हणाले की, रायबागमध्ये सरकारी मालमत्ता हडप करणाऱ्यांविरुद्ध तक्रार दाखल करावी आणि दोषींवर कारवाई करावी. सरकारी मालमत्तेवर एक कंपाउंड बांधण्याची मागणी करताना त्यांनी स्वतःच्या मतदारसंघातील अंगणवाडी केंद्रांमध्ये अन्नपदार्थांच्या अपुऱ्या पुरवठ्याकडे लक्ष वेधले.
विधान परिषद सदस्य नागराज यादव म्हणाले की, सुपर स्पेशालिटी हॉस्पिटलचे उद्घाटन झाले नसले तरी ते काम सुरू झाले आहे. तथापि, रुग्णालयात तज्ञ डॉक्टर आणि आवश्यक कर्मचाऱ्यांची पूर्ण कमतरता असल्याचे असे आढळून आले आहे. परिणामी रुग्णांचे जीवन धोक्यात येऊ नये म्हणून त्यांनी चिंता व्यक्त केली. तसेच रुग्णालयात त्वरित तज्ञ डॉक्टरांची नियुक्ती करण्याची मागणी त्यांनी केली.
जिल्हापालक मंत्र्यांच्या नेतृत्वाखालील शिष्टमंडळ मुख्यमंत्र्यांकडे घेऊन जाणे आणि जिल्ह्यात उद्योगांच्या स्थापनेसह जिल्ह्याच्या सर्वांगीण विकासासाठी आवश्यक योजनांच्या अंमलबजावणी आणि निधी जारी करण्याबाबत चर्चा करणे योग्य ठरेल, असर त्यांनी सांगितले. केडीपी बैठकीला उपस्थित न राहणाऱ्या अधिकाऱ्यांवर त्यांनी टीका केली आणि जिल्हा दंडाधिकाऱ्यांना उपस्थिती तपासण्याची आणि गैरहजर अधिकाऱ्यांवर शिस्तभंगाची कारवाई करण्याची विनंती केली.
विविध विकासकामांसाठी देण्यात येणाऱ्या अनुदानांशी संबंधित कामांच्या निविदा प्रक्रियेत विलंब करणाऱ्या अधिकाऱ्यांवर कारवाई करण्याची मागणी त्यांनी केली. त्यांनी जिल्ह्यातील अनुसूचित जाती / जमातींच्या निवासी शाळांचा वापर एससीपी आणि टीएसपी योजनांअंतर्गत डिजिटल ग्रंथालये आणि व्यायामशाळा यासह विविध विकासकामांसाठी करावा अशी सूचना केली.
आमदार गणेश हुक्केरी यांनी शेती विहीरी बांधताना अडथळे निर्माण करून होणारे मृत्यू आणि दुखापती टाळण्यासाठी उपाययोजना करण्याची मागणी केली. तर कित्तूरचे आमदार बाबासाहेब पाटील यांनी पात्र मच्छिमारांना मत्स्यव्यवसाय विभागाने दिलेल्या तलावांचे भाडेपट्टे देण्यात यावेत, अशी मागणी केली.
रायबागमधील सरकारी मालमत्तेवरील न्यायालयीन खटल्याशी संबंधित स्थगिती आदेश उठवण्याची कार्यवाही केली जाईल, असे जिल्हाधिकारी मोहम्मद रोशन यांनी सांगितले. जिल्ह्यात उद्योगांना चालना देण्यासाठी आवश्यक जागा ओळखल्या जातील आणि औद्योगिक क्षेत्राच्या विस्तारासाठी जमीन संपादित केली जाईल, असे त्यांनी सांगितले. सौंदत्ती यल्लम्मा मंदिराच्या विकासाचे काम सुरू आहे. या व्यतिरिक्त, जिल्हा प्रशासन जोगुळभावी येथील विहिरीची स्वच्छता करण्यासाठी कार्यवाही करेल, असे त्यांनी सांगितले.
जिल्हापंचायतीचे मुख्य कार्यकारी अधिकारी राहुल शिंदे म्हणाले की, शाळांमध्ये आवश्यक असलेले डेस्क लवकरच पुरवले जातील. जिल्ह्यात कृषी आणि फलोत्पादन विभागाने बांधलेल्या शेती विहिरींसाठी बांधण्यात येणाऱ्या संरक्षक भिंतींचे सर्वेक्षण करून अहवाल सादर केला जाईल आणि शेतकऱ्यांमध्ये जागरूकता निर्माण करण्यासाठी पावले उचलली जातील, असे त्यांनी सांगितले.
या बैठकीला हमी योजना अंमलबजावणी प्राधिकरणाचे राज्य उपाध्यक्ष एस.आर. पाटील (बडगी), आमदार विश्वास वैद्य, जिल्हा हमी अंमलबजावणी प्राधिकरणाचे अध्यक्ष विनय नवलगट्टी, बुडाचे अध्यक्ष लक्ष्मणराव चिंगळे, पोलिस आयुक्त ईडा मार्टिन, जिल्हा पोलिस अधीक्षक डॉ. भीमाशंकर गुळेद , नामनिर्देशित सदस्य आणि विविध विभागाचे अधिकारी उपस्थित होते.
बैठकीनंतर, जिल्हापालक मंत्री सतीश जारकीहोळी आणि आमदारांनी चालू वर्षीच्या एसएसएलसी निकालात राज्यात प्रथम क्रमांक पटकावणाऱ्या बैलहोंगल तालुक्यातील देवलपुर गावातील रूपा पाटील या विद्यार्थिनीचा आणि जिल्ह्यातील सर्व तालुक्यातील सर्वाधिक गुण मिळवणाऱ्या विद्यार्थ्यांचा सत्कार केला.
याप्रसंगी गेल्या वर्षीच्या एसएसएलसी परीक्षेत उत्कृष्ट कामगिरी करणाऱ्या विद्यार्थ्यांना लॅपटॉप देण्यात आले. यावेळी जिल्हापालक मंत्री सतीश जारकीहोळी यांनी माहिती आणि जनसंपर्क विभागाने प्रकाशित केलेल्या पंचहमी योजनांच्या यशोगाथा असलेल्या पुस्तिकेचे प्रकाशन केले.
