- आवश्यक पूर्व तयारी करा
- जिल्हाधिकारी मोहम्मद रोशन यांची संबंधित विभागाच्या अधिकाऱ्यांना सूचना
बेळगाव / प्रतिनिधी
भारतीय राज्यघटनेचे शिल्पकार भारतरत्न, डॉ. बाबासाहेब आंबेडकर यांची जयंती १४ एप्रिल रोजी साजरी होणार आहे. याबाबत सर्व संबंधित विभागाच्या अधिकाऱ्यांनी आवश्यक ती तयारी करावी, अशी सूचना जिल्हाधिकारी मोहम्मद रोशन यांनी केली. सोमवार (दि. १७) मार्च रोजी भारतरत्न डॉ. बाबासाहेब आंबेडकर जयंतीच्या पार्श्वभूमीवर आयोजित पूर्वतयारी बैठकीच्या अध्यक्षस्थानावरून ते बोलत होते.
डॉ. बाबासाहेब आंबेडकर यांच्या जयंती दिवशी सकाळी १० वाजता डॉ. आंबेडकर उद्यानात ज्योत प्रज्वलित करण्यात येईल. त्यानंतर डॉ. बाबासाहेब आंबेडकर यांच्या प्रतिमेचे पूजन व पुष्पहार अर्पण करण्यात येणार असल्याचे त्यांनी सांगितले. शहरातील धर्मवीर संभाजी सर्कल येथून मिरवणूक काढल्यानंतर दुपारी चार वाजता डॉ. बाबासाहेब आंबेडकर उद्यानात मुख्य कार्यक्रम होणार आहे. महापालिकेने कार्यक्रमासाठी लागणारे पेंडल, कटआउट, बॅनर, आसनव्यवस्था, बागेची स्वच्छता शहरातील महत्त्वाच्या मंडळांमधील तात्पुरती स्वच्छतागृहे उपलब्ध करून द्यावीत, अशा सूचना केल्या.
- मिरवणूक :
आंबेडकर जयंती दिवशी धर्मवीर संभाजी चौक ते किर्लोस्कर रोड, रामदेव गल्ली, खडेबाजार, शनिवार खुट, काकतीवेस, चन्नम्मा सर्कल मार्गे आंबेडकर गार्डनपर्यंत सजवलेल्या वाहनांची मिरवणूक काढण्यात येईल. डॉ. बाबासाहेब आंबेडकरांच्या चरित्राचा अभ्यास केलेल्या व्यक्तींना समाजाच्या नेत्यांनी सुचविल्याप्रमाणे व्याख्यानासाठी आमंत्रित करावे, असे ते म्हणाले.आमंत्रणे शिष्टाचारानुसार छापली पाहिजेत आणि प्रतिनिधींना आगाऊ आमंत्रित केले अशी सूचना त्यांनी केली. मिरवणुकीत सहभागी होण्यासाठी कन्नड आणि सांस्कृतिक विभागाकडून स्थानिक कला पथकांना आमंत्रित करण्यात येणार असल्याचे जिल्हाधिकारी मोहम्मद रोशन यांनी सांगितले.
- आंबेडकर जयंतीसाठीआवश्यक सुविधा उपलब्ध करून देण्याची विनंती :
मिरवणूक आणि कार्यक्रम निर्धारित वेळेत व्हावा, असे समाजाचे नेते मल्लेश चौगुले यांनी सांगितले. एप्रिलच्या पहिल्या आठवड्यात शाळेतील मुलांना सुट्टी असल्याने संविधानाचे शिल्पकार डॉ. बाबासाहेब आंबेडकर यांच्या जयंतीबाबत अगोदर चर्चा झाली पाहिजे, असे ते म्हणाले.
जयंती साजरी करताना खबरदारीचा उपाय म्हणून रुग्णवाहिका, पिण्याचे पाणी, मोबाईल टॉयलेटची व्यवस्था करावी. जिल्ह्याच्या विविध भागातून अधिक लोक येण्याची शक्यता असल्याने वैद्यकीय कर्मचाऱ्यांची नियुक्ती करावी, असे ते म्हणाले. मिरवणुकीदरम्यान काही भागात वाहतुकीची समस्या निर्माण होत असल्याने आवश्यक त्या ठिकाणी वाहतूक पोलिसांची नियुक्ती करावी. आंबेडकर जयंतीला येणाऱ्या त्यांच्या अनुयायांना मुक्त संचार करण्याची परवानगी द्यावी, अशी विनंती मल्लेश चौगुले यांनी केली.
तर कंग्राळी गावातील एका महिलेने प्रत्येक महत्त्वाच्या मंडळात संविधान आणि आंबेडकरांचे संदेश असलेले फलक लावावेत अशी विनंती केली. तर अन्य नेते दुर्गेश मेत्री म्हणाले की, गेल्या वर्षी मिरवणुकीसाठी प्रत्येक गावातून वाहने येत असताना ग्रामीण पोलिसांनी लोकांना परत पाठवल्याची घटना घडली होती.
- शासकीय कार्यालयात आंबेडकरांच्या प्रतिमेचे पूजन अनिवार्य :
शाळा – महाविद्यालयांना सुट्टी असल्याने दि. १४ एप्रिल रोजी शाळा – महाविद्यालयांमध्ये आंबेडकर जयंती अनिवार्यपणे साजरी करण्याचे आदेश द्यावेत, अशी विनंती नेत्यांनी बैठकीत केली. एससी – एसटी ॲट्रॉसिटी कंट्रोल नेमिंगचे सदस्य कारेप्पा गुडेन्नावर म्हणाले, सरकारने आधीच निवासी शाळांना डॉ. बाबासाहेब आंबेडकरांचे नाव देण्याचा आदेश जारी केला आहे, त्यामुळे त्यांनी सरकारचे अभिनंदन केले.
जिल्हाधिकारी मोहम्मद रोशन म्हणाले, दरवर्षीप्रमाणे आंबेडकर जयंती दिनी दारू बंदी करण्यात येणार आहे. शिक्षण विभागाकडून माहिती मिळाल्यानंतर समाजातील गुणवंत विद्यार्थ्यांचा सत्कार कार्यक्रम आयोजित करण्यात येणार असल्याचे त्यांनी सांगितले. यावेळी समाजाचे युवा नेते विवेक कर्पे यांनी पुस्तकप्रेमींनी आंबेडकरांचे लेख, चरित्र यांच्या विचारांनुसार पुस्तकांची दुकाने उभारावीत, अशी विनंती केली. त्याला उत्तर देताना जिल्हाधिकारी मोहम्मद रोशन यांनी कन्नड आणि संस्कृती विभाग आणि जिल्हा ग्रंथालय विभागाने पुस्तकांची दुकाने सुरू करावीत, अशी सूचना केली.
यावेळी जिल्हा पोलीस अधीक्षक डॉ. भीमशंकर गुळेद यांनी दरवर्षीप्रमाणे यंदाही आंबेडकर जयंती सोहळ्यासाठी आवश्यक सुरक्षा उपाययोजना करण्यात येणार असल्याचे सांगितले. राज्यघटनेचे शिल्पकार डॉ. बाबासाहेब आंबेडकर यांची जयंती सक्तीने साजरी करण्याचा आदेश आहे. कोणतीही त्रुटी राहू नये यासाठी जिल्हा पंचायतीमार्फत सूचना देण्यात येतील, असे जि. पं. चे मुख्य कार्यकारी अधिकारी राहुल शिंदे यांनी सांगितले.
या बैठकीला महापालिका आयुक्त शुभा बी. एसीपी सदाशिव कट्टीमणी, समाज कल्याण विभागाचे सहसंचालक रमणगौडा कन्नोल्ली, जिल्हा अनुसूचित जाती कल्याण अधिकारी बसवराज कुरिहुली, कृषी विभागाचे सहसंचालक शिवनगौडा पाटील, जिल्हा नगरविकास कक्ष नियोजन संचालक मल्लिकार्जुन कलादगी, पशुसंवर्धन विभागाचे उपसंचालक डॉ. राजीव कुलैर, भावकान्ना भाग्यगोळ, महेश शिगीहळ्ळी, लक्ष्मण कोलकार, प्रवीण चलवादी आदींसह समाजातील नेते व मान्यवर उपस्थित होते.
